Оштогу эстакадалык көпүрөдөн автоунаа кулап, алты адам жабыркады

Мезгил. 

Ош шаарындагы эстакадалык көпүрөдө кырсык орун алды. Көпүрөдөн өтүп бараткан маршруттук такси жеңил автоунаа менен сүзүшүп,  айдоочу рулду башкара албай калган да, беш метр бийиктиктен көпүрө алдындагы жолго кулаган. Маршруттук таксинин ичиндеги   алты жүргүнчү Ош облустук  ооруканасына жеткирилген. Алар ар кандай жарааттарды алышкан, арасындагы  48 жаштагы аялдын колу-буту сынып,  оор акыбалда оорукананын жандандыруу бөлүмүнө  түшкөн.

Күбөлөрдүн айтымында, кырсыктагандарга ошол жердеги жарандар жардамга келишкен. Алар маршруттук таксинин айнектерин сындырышып, ичиндеги жүргүнчүлөрдү сыртка чыгарышкан. Андан кийин Тез жардам келип, жабыркагандарды ооруканага алып кеткен.

 

Ош шаардык милициясынын маалыматына караганда, кырсыктаган автоунаа шаар ичиндеги №102 багыт менен каттаган маршруттук такси болгон. Анын айдоочусу 27 жашта. Унаа көпүрөдөн өтүп баратканда тормозу иштебей калган. Ошол учурда карама каршысында келаткан “Хонда Фит” үлгүсүндөгү автоунаага урунган. Жүргүнчүлөр менен катар айдоочу да жаракат алып, учурда ооруканада дарыланууда.

Ош шаарынын борборундагы Ак-Буура дарыясынын үстүнө эстакадалык көпүрө 2015-жылы 650 миллион сомго курулган. Анын узундугу 250 метр.

Булак: Мезгил Ньюс 

Бөлүшкүлө

Share to Google Plus
Share to MyWorld
Share to Odnoklassniki

Leave a Reply

Your email address will not be published. Required fields are marked *