Президент медиа өкүлдөрү өз ишине, сөзгө, адам тагдырына жоопкерчилик менен мамиле кылыш керектигин айтты

 Мезгил

Президент Сооронбай Жээнбеков бүгүн, 29-августта, Эркин Европа/Азаттык Радиосунун Президенти Джейми Флайды кабыл алды. Бул тууралуу президенттин маалымат кызматы билдирди. 

 Өлкө башчы  Джейми Флайды жаңы кызматка дайындалышы менен куттуктады жана анын ишмердүүлүгүнө ийгиликтерди каалады.

Президент белгилегендей, Кыргызстан демократиянын принциптерин жана ачыктыкты жогору баалайт, өлкөдө массалык маалымат каражаттарынын эркин жана толук кандуу иштөөсү үчүн бардык зарыл шарттар бар.

Сооронбай Жээнбеков сөз эркиндигин бекемдөө күчтүү жана ачык жарандык коомду куруунун, өлкөнү өнүктүрүүнүн башкы негиздеринин бири экендигин баса белгиледи.

Президент ошондой эле медиа өкүлдөрү да өз ишине, сөзгө, адам тагдырына жогорку деңгээлдеги жоопкерчилик менен мамиле кылыш керектигин кошумчалады.

Эркин Европа/Азаттык Радиосунун президенти Джейми Флай Кыргызстандагы оң маанайдагы демократиялык процесстерди, ачыктыктын деңгээлин жана сөз эркиндигин канааттануу менен белгиледи.

Ал Азаттык Радиосунун өлкөдөгү ийгиликтүү ишмердиги ачыктык жана ММКлар үчүн түзүлгөн шарттар менен шартталганын кошумчалады.

Жолугушууда сөз эркиндигин бекемдөө чаралары, демократиялык коомду курууда ММКнын ролу тууралуу пикир алмашуу болду.

Булак: Мезгил ньюс 

Бөлүшкүлө

Share to Google Plus
Share to MyWorld
Share to Odnoklassniki

Leave a Reply

Your email address will not be published. Required fields are marked *